अन्जनी कै लाल नै गुहार तो करो, गुहार तो करो
बाबो दौड़यो आवैगो पुकार तो करो
सूणों सूणों सिन्दूरी सिंगार तो करो, सिंगार तो करो
बाबो दौड़यो आवैगो पुकार तो करो
दुनिया म्हे है प्रसिद्ध बाबै की अदा
बाबै की अदा पै सियारामजी फ़िदा
भक्तां की रुखाली बाबो करै है सदा
पापियाँ को नाश करै बाबै की गदा
बाबै की गदा को सतकार तो करो, सतकार तो करो
बाबो दौड़यो आवैगो पुकार तो करो
मंगळ कै मंगळ लगाओ घोक जी
कट जासी संकट, मिटैगा रोग जी
आज़माल्यो आज ही थे सारा लोग जी
बाबै नै भावै है चूरमा को भोग जी
चूरमो चढ़ा कै मनुहार तो करो, मनुहार तो करो
बाबो दौड़यो आवैगो पुकार तो करो
-अलबेला खत्री
